PERANDORI OSMANE, TE LUTEM RIKTHEHU! (4)

Edhe pse është e vërtetë se dy trashëgimtarët e lavdisë bizantine, Rusia dhe Perandoria Osmane, kanë luftuar kundër njëra - tjetrës për shekuj me radhë, e njëjta gjë ka ndodhur edhe mes francezëve dhe gjermanëve, trashëgimtarëve të Perandorisë Romake perëndimore. Dhe ndërsa këta armiq shekullorë sot kanë arritur të bashkohen në Perëndim, e njëjta gjë mund të ndodhë edhe me ne, në Lindje.
Gjatë kësaj vere ndërsa udhëtoja nëpër Rusi dhe Ukrainë, vura re afërsinë e madhe që ekziston midis rusëve dhe turqve (apo tatarëve siç njihen ata në Rusi). Çurçilli jo më kot ka thënë në kohën e tij se "nëse një rus gërvishtet pak - kthehet në turk". Ndërsa historiani i madh rus, Leon Gumilev, i cili njihej për tendencat pro lindore, mendonte të kundërtën. Dhe faktet flasin të njëjtën gjë. Shteti rus lindi si pasojë e bashkimit të turqve muslimanë të stepave me sllavët ortodoksë të pyjeve. Gumilevi mendonte se nëse Rusia do të bashkohej me turqit një ditë, atëherë Perëndimi, të cilin ai e shihte si armikun më të madh, nuk do ta mundte dot kurrë.
Shkrimtari dhe udhëheqësi bolshevik, Eduard Limonov, në fundin e jetës së tij, Rusinë e përshkruante si “një Turqi me veshje gjermane”. Por edhe në ditët tona, rusët preferojnë të veshin shallvare sipas modës së Anadollit dhe aristokracisë së dikurshme osmane dhe të kuvendojnë si turqit. Ndjenjat pozitive të rusëve ndaj turqve janë shumë më të ndryshme se sa paragjykimet e evropianëve mbi ta. Këto ndjenja kanë gjetur rrugë edhe në filmin e suksesshëm “Manovra Turke”, i cili përshkruan luftën ruso-turke për Plevnën, në të cilin Osman Nuri Pasha portretizohet si një hero i vërtetë, dhe jo si nëpër filmat racistë që Hollivudi ka zakon të prodhojë.
Afërsia ndërmjet turqve dhe sllavëve ka një histori të gjatë. Në Ukrainën veriore, unë kam vizituar Novgorodin, Chernigovin dhe Kievin, kryeqytetet e hershme të principatave ruse. Një nga epikat ruse të shekullit të 12-të rrëfen se si princi i Novgorodit, Igori, pasi sulmoi turqit në stepë, u mund nga këta të fundit.                        (Vijon)