RENDESIA E SALAVATIT (1)

T’i japësh salavat dhe selam Hz. Muhammed (s.a.v.s) dhe pejgamberëve të tjerë (a.s.) është një shprehje e lidhjes, dashurisë dhe respektit ndaj tyre.
Gjithashtu ky është një ibadet (adhurim) që mund të bëhet shumë lehtë. Një nga gjërat e urdhëruara nga Allahu i Madhëruar është të japësh salavat dhe selam. Në një ajet kur’anor, Allahu Teala thotë: “O ju që keni besuar, madhërojeni pra atë (duke dhënë salavat) dhe përshëndeteni me selam...” ( El Ahzab, 56) 
Fjala salavat ka kuptimin: dua, namaz, rahmet e mëshirë, por gjithashtu ka kuptimin e të qenit afër. Allahu Teala ne ajetin 56 të sures El Ahzab urdhëron: “Është e vërtetë se Allahu dhe ëngjëjt e tij me madhërim e mëshirojnë Pejgamberin.” 
Gjithashtu fjala salavat kur bëhet nga Allahu Teala merr kuptimin “mëshirë” ndërsa kur bëhet nga ëngjëjt merr kuptimin “kërkesë e mëshirës së Zotit”. 
Ëngjëjt kur bien në salavat thonë: O Zoti ynë, fale dhe mëshiroje atë. Rreth kësaj edhe Kushejri (një dijetar islam) thotë: “Kur Zoti u jep salavat njerëzve do të thotë që i mëshiron ato, ndërsa kur Zoti u sjell salavat pejgamberëve, do të thotë se po i jep nder atyre.” Ndërsa sipas Ebul Alije thotë: “Kur Zoti u jep salavat pejgamberëve do të thotë se i lavdëron ato para engjëjve, ndërsa kur i japin engjëjt salavat profetëve do të thotë që ata luten për pejgamberët.”              (Vijon)