DHJETE DITET E PARA TE MUAJIT DHUL-HIXHE (1)

Ibn Abasi ka treguar se i Dërguari i Allahut (s.a.v.s) ka thënë: "Nuk ka ditë gjatë të cilave punët e mira janë më të dashura tek Allahu se këto ditë (duke nënkuptuar dhjetë ditët e para të Dhulhixhes)". Ata pyetën: "As xhihadi në rrugë të Allahut?" Ai tha: "As xhihadi në rrugë të Allahut me përjashtim të njeriut që niset me shpirtin dhe pasurinë e tij dhe kthehet me asnjërën prej tyre". (Buhari)
Ibn Umeri ka treguar se i Dërguari (s.a.v.s) ka thënë: "Nuk ka ditë më të mëdha dhe nuk ka ditë gjatë të cilave punët e mira janë më të dashura tek Allahu se këto 10 ditë (të Dhul-hixhes). Kështu, thoni vazhdimisht Tehlilin (La ilahe ila-llah), Tekbirin (Allahu Ekber) dhe Tehmidin (Elhamdu lil-lah)." (Ahmedi)
Xhabiri ka thënë: "Dita më e virtytshme është dita e Arafatit."
Vepra që rekomandohen gjatë dhjetë ditëve të Dhulhixhes
1. Kryerja e Haxhit dhe Umres
Ky është adhurimi më i mirë që mund të bëhet gjatë këtyre ditëve ashtu siç tregohet nga i Dërguari (s.a.v.s) i cili ka thënë për Haxhin e pranuar: "Haxhi i pranuar nuk ka shpërblim tjetër veç Xhennetit". Në një hadith tjetër të treguar nga Ebu Hurejra i Dërguari (s.a.v.s) ka thënë: "Kushdo që kryen Haxhin vetëm për hir të Allahut dhe që nuk bën keq apo mëkate atëherë ai do të kthehet sikur të lindte përsëri". (Buhari)
2. Agjërimi i të gjitha apo disa prej këtyre ditëve, veçanërisht ditën e Arafatit (dita 9 Dhul-hixhe)
I Dërguari (s.a.v.s) ka thënë: "Agjërimi i ditës së Arafatit shlyen (mëkatet) e vitit paraardhës dhe atij pasardhës".
3. Thënia e Tekbirit dhe bërja e dhikrit
Allahu (xh.sh.) thotë: "Dhe përmend emrin e Allahut në ditët e caktuara." (Kur'an 22: 28)               (Vijon)