Untitled Document

FALENDERIMI I ALLAHUT

Musai alejhis-selam pyeti Allahun:

- O Allah si mund të të falenderojnë njerëzit ty për të gjitha të mirat që i ke dhënë?

Allahu teala iu përgjigj:

"O Musa! N.q.s njerëzit e pranojnë se të gjitha të mirat i kanë prej meje, nuk mendojnë se i kanë prej vetes së tyre, e kanë kryer falenderimin. Nëse njerëzit mendojnë se të mirat që kanë, i kanë arritur me punën e tyre e jo me rriskun tim, nuk kanë falenderuar."

Allahu teala në një hadith kutsi ka thënë:

"Unë i krijova njerëzit dhe Xhindët. Ndërsa ata i bëjnë ibadet tjetërkujt, jo Mua. Rriskun ua jap unë, falenderojnë të tjerët!"

Dauti alejhis-selam iu drejtua Allahut teala dhe e pyeti:

- O Zot! Ti i ke dhënë shumë të mira Ademit alejhis-selam. Si të ka falenderuar ai ty?

Allahu teala iu përgjigj:

"O Daut! Ai e dinte se të gjitha këto të mira i kishte nga ana ime. Këtë gjë e pranova si falenderimin e tij!"

Përsëri Dauti alejhis-selam pyeti Allahun:

- O Zot! Si mund të të falenderoj për të mirat që më ke dhënë. Sepse edhe të dish të falenderosh është një e mirë që ta jep vetëm Ti.

Allahu teala iu përgjigj:

" O Daut! Ti tani falenderove. E Kuptove që je nevojtar, e kuptove çfarë është falenderimi."