DRITA E SYVE

Një besimtar kishte shkuar për vizitë tek shtëpia e një qorri. Në një cep të shtëpisë mbi tavolinë pa një Kur’an që qëndronte sikur po e lexonte dikush. Mendoi me vete: “Çfarë pune ka Kur’ani në këtë shtëpi? Ky burrë është qorr dhe në shtëpi nuk jeton askush tjetër.”
Megjithëse u çudit nga ajo që pa nuk pyeti. Natën kur ishte në gjumë filloi të dëgjonte një zë që lexonte Kur’an. Kur u ngrit u çudit shumë nga ajo që pa. I zoti i shtëpisë ishte ngritur dhe po lexonte Kur’an pa bërë asnjë gabim. I çuditur e pyeti:
- Si ka mundësi që të lexosh kur ti je qorr?
- Përse çuditesh? Nuk mjafton fuqia e Allahut për ta bërë diçka të tillë? Unë një ditë bëra dua “O Allah, më bëj që të lexoj Kur’anin.” Allahu ma pranoi këtë dua. Sa herë që dua të lexoj Kur’an Allahu ma jep dritën e syve.