Рамазон суҳбати... Очиқча гуноҳ қилиш

Рамазонда одамларнинг кўз олдида овқат ейиш катта гуноҳ. Нафсининг истакларига берилиб, гуноҳ қилаверадиганлар ҳам доимо гуноҳини одамлардан яшириши керак. Бунинг бир неча фойдаси бор.

1. Агар қилган гуноҳимиз халқнинг кўзидан яширин бўлса, бунга хурсанд бўлиш керак. Чунки Аллоҳу таоло: “Гуноҳни яширинглар!” деб буюрган. Пайғамбаримиз ҳам: “Инсон гуноҳини бу ҳаётда яширса, Аллоҳу таоло ҳам қиёматда бу гуноҳни бошқа қулларидан яширади” деганлар. (Муслим)

2. Аллоҳу таоло очиқча, ҳеч кимдан тортинмасдан гуноҳ қилганларга кўпроқ душман бўлади. Лекин пушаймон бўлиб гуноҳини яширганларни, яширгани учун кечириши мумкин. Ҳадиси шарифда: “Бир гуноҳга қўл урган киши гуноҳини яширсин! Аллоҳнинг пардасини очмасин!” - дейилди. (Муслим)

3. Гуноҳ қилишда ҳеч бўлмаса, халқдан уялиш керак. Бошқаларнинг оғзига сақич бўлмаслик, уларнинг ғийбатига сабаб бўлмаслик учун гуноҳини яшириш керак. Ҳадиси шарифларда: “Уялиш - яхшиликдир.” (Бухорий), “Уят – иймондандир” (Бухорий), “Уятсизнинг дини бўлмайди ва уятсиз киши жаннатга кира олмайди” (Дайламий) дейилган.

4. Одамларга ёмон ўрнак бўлмаслик учун, бошқаларнинг гуноҳ қилишига йўл очиб бермаслик учун ҳамма ўз гуноҳини яшириши керак. Мана шу сабаблар туфайли очиқча гуноҳ қилмасликка, халқдан узоқ ерларда ҳам гуноҳлардан борича узоқ туришга ҳаракат қилиш керак. Чунки гуноҳларнинг ҳаммаси худди беомон заҳарга ўхшайди. Иймонли киши гуноҳга қўл уришдан кўрқади. Ҳадиси шарифда бундай дейилди: “Мусулмон ҳар бир гуноҳини тоғдек кўради, унинг остида қолиб кетишдан қўрқади. Мунофиқ эса, гуноҳларини худди бурнига қўниб, ҳозир учиб кетадиган чивиндек кўради.” (Бухорий)